Një nga pyetjet e mëdha sot do të jetë nëse inkursioni i trupave ruse në Ukrainën lindore do të sjellë fundin e Nord Stream 2, gazsjellësi midis Rusisë dhe Gjermanisë që paraqet një objektiv të qartë për sanksione.
Pas një telefonate me presidentin e SHBA Joe Biden dhe Emanuel Macron të Francës mbrëmë, kancelari gjerman, Olaf Scholz, dënoi ashpër veprimet e Rusisë si “një shkelje të qartë të Protokollit të Minskut”, duke u zotuar se “ky hap nuk do të mbetet pa përgjigje”.
Por deri më tani qeveria gjermane nuk ka thënë ende se çfarë do të jetë përgjigja e saj.
Kolegu i partisë socialdemokrate të Scholz, Michael Roth, kryetar i komitetit të politikës së jashtme të Bundestagut, ka bërë thirrje për sanksione të shpejta që synojnë “sistemin oligarkik, njerëzit që janë pasuruar përmes Putinit”.
Roth i tha Reuters: “Sanksionet e para tashmë duhet të jenë të dhimbshme për sistemin e Putinit”.
Zëdhënësi i politikës së jashtme të grupit të partisë SPD, Nils Schmid, paralajmëroi se çdo reagim ndaj shkeljes së Protokollit të Minskut nuk duhet të ndikojë në qëndrimin kufizues të Gjermanisë për eksportimin e armëve vdekjeprurëse.
“Ne nuk duhet të dorëzojmë armë vdekjeprurëse në Ukrainë”, tha Schmid.
